काठमाडौँ– सोमबार कीर्तिमान बनाएको शेयर बजारमा मंगलबार गिरावट आएको छ । मंगलबार नेप्से परिसूचक ३.७२ अंकले ओरालो लागेको हो ।

क वर्गंका कम्पनीको कारोबार मापन गर्ने सेन्सिटिभ सूचक भने शून्य दशमलव २५ अंकले हरियो छ । आजको कारोबारमा २ सय २६ कम्पनी सामेल भएका छन् । नेपाल स्टक एक्सचेन्जका अनुसार ती कम्पनीको आज ३ करोड ९ लाख ४८ हजारभन्दा धेरै कित्ता सेयर बिक्री भएको छ ।

दिनभरीमा एक लाख ६४ हजार ७ सय ९० पटकको किनबेचमा १६ अर्ब ५२ करोड ८७ लाख ४९ हजार ७ सय ३९ रुपैयाँको सेयर कारोबार भएको हो ।

आज १३ मध्ये लगानी, म्युचुअल फन्ड, अन्य, उत्पादन र होटल तथा पर्यटन समूहको सूचक बढे पनि बाँकी समूहको घटेको छ ।

आजको कारोबारमा तीनवटा कम्पनीका लगानीकर्ताले १० प्रतिशत हाराहारीमा आम्दानी गरेका छन् । सीईडीबी हाइड्रोपावर डेभलपमेन्ट कम्पनी लिमिटेड, खानीखोला हाइड्रोपावर कम्पनी र युनियन हाइड्रोपावर लिमिटेडका लगानीकर्ताले क्रमशः ६०, २७ र ३६ रुपैयाँ प्रतिशेयर आम्दानी गरेको नेप्सेले जनाएको छ।