काठमाडौं– नर्भिक अस्पतालमा उपचाररत मोडल तथा कलाकार निशा घिमिरेलाई सहयोग गर्ने दाताहरुको संख्या दिनानुदिन बढिरहेको छ । दाताहरु निशाको भैसेपाटीस्थित घरमा पुगेर उनका पिता प्रेम घिमिरेलाई आर्थिक सहयोग गरिरहेका छन् ।

उनलाई चलचित्र विकास बोर्डअन्तर्गतको चलचित्रकर्मी कल्याणकारी कोषबाट ५१ हजार प्रदान गरिएको छ । बोर्ड अध्यक्ष दयाराम दाहालका अनुसार निशालाई यसअघि पनि बोर्डबाट सहयोग भएको थियो ।

त्यस्तै अभिनेत्री करिश्मा मानन्धरबाट २५ हजार, अभिनेत्री रेजिना उप्रेतीबाट १० हजार, अमेरिकामा रहेकी अभिनेत्री उषा पौडेलबाट २२ हजार, प्रकाश थापाबाट १० हजार, नेपाल म्युजिक भिडियो कलाकार संघबाट २० हजार सहयोग भएको छ ।

यसैगरी गायक शिव परियार १० हजार र अभिनेत्री आँचल शर्मा एक लाख रुपैंयाँ सहयोग गरेकी छन् । राष्ट्रिय लोक तथा दोहोरीगीत प्रतिष्ठानले पनि निशाको उपचारार्थ ५१ हजार रुपैंयाँ सहयोग गरेको छ ।

प्रतिष्ठानका अध्यक्ष रमेश बिजी र निवर्तमान अध्यक्ष बद्री पंगेनीसहितको टोली अस्पताल पुगेर निशालाई आर्थिक सहयोग गरेको हो ।

निशाका पिता प्रेमले छोरीको उपचारमा हालसम्म ३० लाख बढी खर्च भइसकेको जानकारी दिए ।

तीन वर्षअघि मोडलिङ पढ्न भारतको देहरादुन पुगेको डेढ महिनामा नै निशा सडक दुर्घटनामा परेकी थिइन् । दुर्घटनामा टाउकोमा गम्भीर चोट देहरादुनमा प्राथमिक उपचार गरेर उनलाई काठमाडौंको ट्रमा सेन्टरमा ल्याइएको थियो ।

निशाको स्वास्थ्य अवस्थाबारे थाहा पाएपछि नर्भिक अस्पतालकी निर्देशक मेघा चौधरीले घरबाट उद्धार गरी नर्भिकमै निःशुल्क उपचार गराइरहेकी छन् ।

तीजको गीतको भिडियोबाट मोडलिङ यात्रा सुरु गरेकी निशाले तीन दर्जन बढी म्यूजिक भिडियोमा अभिनय गरेकी थिइन् । उनले फिल्म ‘मधेशीपुत्र २’, टेलीफिल्म ‘डियर जिन्दगी’मा पनि अभिनय गरेकी थिइन् ।