इडिन्सन काभानी, जुलियन ड्राक्सलर र मौसा डियाबाले एक—एक गोल गरेपछि पेरिस सेन्ट जर्मेन (पिएसजी) फ्रेन्च कप फुटबलको क्वाटरफाइनलमा प्रवेश गरेको छ ।

बुधबार राति भएको अन्तिम—१६ को खेलमा भिलेफ्रेन्चेलाई इन्जुरी समयमा ३—० गोल अन्तरले पराजित गर्दै पिएसजीले अन्तिम आठको यात्रा तय गरेको हो ।

भिलेफ्रेन्चेको मैदानमा जित निकाल्न पीएसजीले अतिरिक्त समयसम्म कुर्नु परेको थियो । खेलको निर्धारित ९० मिनेटको समयसम्म गोलरहित भएको अवस्थामा खेल अतिरिक्त समयमा धकेलिएको थियो ।

अतिरिक्त समयको १०२ औं मिनेटमा ड्राक्सलरले पहिलोे गोल गर्दै टिमलाई १—० गोलको अग्रता बनाएका थिए भने ११३ औं मिनेटमा मौसाले पिएसजीलाई २—० को अग्रता लिएको थियो ।

खेलको अन्तिम तथा निर्णायक गोल खेलको ११९ औं मिनेटमा इडिन्सन काभानीले गोल गर्दै पिएसजीलाई ३—० को जित दिलाएको थियो ।