काठमाडौँ– सोमबार शेयर बजार मापक नेप्से परिसूचक ०.२१ अंकले घटेको छ । हिजो आइतबार हालसम्मकै उच्च अंकमा पुगेर रेकर्ड कायम गरेको नेप्से साताको दोस्रो कारोबार दिन आज भने ओरालो लागेको हो ।

सोमबार सुरुवातमा उच्च अंकले बढेको शेयर बजार केही करेक्सनसहित बन्द भएको छ । २९२८ अंकसम्म पुगेको बजारमा सामान्य करेक्सन देखिएको छ ।

बजार ०.२१ अंकले घटेर २९०६.७ मा बन्द भएको छ । सोमबार १५ अर्ब ८१ करोड रुपैयाँको शेयर किनबेच भएको छ । वित्तीय क्षेत्रतर्फको विकास बैंक फाइनान्स, जीवन र निर्जीवन बीमा समूह भने बढेको छ । लघुवित्त मात्र ओर्लिएको छ ।

बैंकिङ समूह अन्तर्गत कारोबार भएका सबै वाणिज्य बैंकहरुको मूल्य घटेको छ । राम्रा र बलिया कम्पनीको सूचक सेन्सेटिभ इन्डेक्स पनि ०.३८ अंकले घटेर ५२०.६३ को विन्दुमा झरेको छ । नेप्से उपसमूहमा रहेका १३ वटा समूहमध्ये ७ वटामा हरियाली छाएको छ भने ६ वटामा रातो पोतिएको छ ।

यो दिन विकास बैंक समूह सर्वाधिक २६०.०६ अंकले उकालो लागेको छ । वित्त समूह १६२.९४ अंकले बढेको आज जलविद्युत समूहमा ९१.६५ अंक, निर्जीवन बीमा समूहमा ३१.६५ अंक, अन्य समूहमा ५.१ अंक, जीवन बीमा समूहमा १६.०४ अंक र म्युचुअल फन्ड समूहमा ०.१ अंकको बढोत्तरी भएको छ ।

यो दिन व्यापार समूह सर्वाधिक ९२.२७ अंकले ओरालो लागेको छ । होटेल तथा पर्यटन समूह ४२.४९ अंकले घटेको आज बैंकिङ समूहमा ३१.७४ अंक, उत्पादन तथा प्रशोधन समूहमा २१.२ अंक, लघुवित्त समूहमा २२.४३ अंक र लगानी समूहमा ०.१ अंकको गिरावट आएको छ ।