एजेन्सी–नर्वेमा युरोपकै पहिलो पानीमुनी रेस्टुरेन्ट खुलेको छ । पानीमो डुबेको ट्युबको जस्तो आकारमा उक्त रेस्टुरेन्टलाई निर्माण गरिएको छ । रेस्टुरेन्टको नाम ‘अन्डर’ राखिएको छ, जसको नर्वेजियन भाषामा अनौठो अर्थात अद्वितीय भन्ने अर्थ लाग्छ ।

यो रेस्टुरेन्ट सञ्चालनमा आउनु अगावैबाट बुकिङ खुल्ला गरिएको थियो । यसका लागि करिब सात हजार मानिसले उक्त रेस्टुरेन्टमा आएर आनन्द लिन बुकिङ गरेका थिए ।

रेस्टुरेन्ट समुद्रको पाँच मिटर गहिराईमा बनाइएको छ । यसलाई नर्वेका आर्किटेक्चरल फर्म स्नोहेटाले डिजाइन गरेको हो । यो रेस्टुरेन्टका मालिक स्टिग र गाँटे दाजुभाइ हुन् । उनीहरुले हरेक वर्ष १२ हजार मानिस आफ्नो रेस्टुरेन्टमा आउने अपेक्षा गरेका छन् । यो रेस्टुरेन्टमा पाइने खानाको मेन्यु तयार गर्न डेढ वर्ष लागेको रेस्टुरेन्टका सेफ निकोलईले बताएका छन् ।

समुद्री जीव तथा उनीहरुको गतिविधिबारे जान्न चाहने शोधकर्ता तथा इच्छुक व्यक्तिका लागि उक्त रेस्टुरेन्ट सबै भन्दा उपयुक्त विकल्प हुने रेस्टुरेन्ट सञ्चालकको भनाइ छ । यो रेस्टुरेन्टमा खानु पिउनुको मज्जा सँगसँगै अध्ययन पनि गर्न सकिने छ । यस किसिमका रेस्टुरेन्ट मालद्वीपमा रहे पनि युरोपमा भने पहिलो भएको दावी गरिएको छ ।