पोखरा-  गण्डकी प्रदेशमा कोरोना संक्रमणबाट मृत्यु हुनेको संख्या ६ सय ६१ पुगेको छ ।

आइतबार संक्रमणबाट १६ जनाको मृत्यु भएसँगै प्रदेशभर कोरोनाबाट मृत्यु हुनेको संख्या ६ सय ६१ पुगेको हो ।

आइतबार अपराह्न प्राप्त २४ घण्टाको विवरणमा कास्कीका ८ जना, तनहुँका ४ जना तथा लमजुङ, बाग्लुङ्, मुस्ताङ र पर्वतका १/१ जनाको मृत्यु भएको निर्देशनालयले जनाएको छ ।

यस्तै, आइतबार गण्डकीका ५४० थप जनामा कोरोना संक्रमण पुष्टि भएको छ ।

पछिल्लो २४ घण्टामा गण्डकीका १ हजार ६६३ जनामा गरिएको नमूना परीक्षणमा थप ५४० जनामा संक्रमण पुष्टी भएको स्वास्थ्य निर्देशनालय पोखराले जनाएको छ ।

आइतबार संक्रमण पुष्टी हुनेमा बाग्लुङका ११५ जना, गोरखाका १०४, लमजुङका ८९ जना, नवलपुरका ८५ जना, कास्कीका ७४ जना, पर्वतका ३४, तनहुँका १७, म्याग्दी जिल्लाका १५ र स्याङ्गजाका ७ जना छन् । योसँगै गण्डकीमा कोरोना संक्रमितको कूल संख्या ४१ हजार ६८२ पुगेको छ ।

पछिल्लो २४ घण्टामा गण्डकी प्रदेशबाट ८५९ जना कोरोनामुक्त भएका छन् । प्रदेशमा कोरोनामुक्त हुनेको संख्या अहिलेसम्म ३० हजार २३२ पुगेको निर्देशनालयले जनाएको छ ।