काठमाडौँ– त्रिभुवन विश्वविद्यालयले कोभिड–१९ खोप लगाउन नपाएका विद्यार्थी, प्राध्यापक र कर्मचारीहरूलाई स्वेच्छिक आवेदन फारम भर्न आग्रह गरेको छ ।

नेपाल सरकारले विगतका दिनहरूमा कोभिड १९ को पहिलो र दास्रो डोज खोपको लगाउन नपाएका व्यक्तिहरूका लागि अनलाइन माध्यमबाट कोभिड १९ को पहिलो डोज खोपको लागि स्वैच्छिक आवेदन फारम भर्ने भराउने कार्य शुरु गरेको हुँदा त्रिविले उक्त आग्रह गरेको हो ।

खोप नलगाएका त्रिविमा अध्ययन, अध्यापन र व्यवस्थापन कार्यमा संलग्न शिक्षक कर्मचरी र विद्यार्थीलाई नेपाल सरकारको स्वास्थ्य तथा जनसंख्या मन्त्रालयको वेब पेजमा गई तोकिएका बमोजिम फारम भर्न त्रिविले अनुरोध गरेको छ ।

त्रिविले शनिबार एक सूचना जारी गर्दै विश्व महामारीको रुपमा फैलिएको कोरोना संक्रमणको पहिलो र दोस्रो लहरले विश्वविद्यालयमा अपुरणीय क्षति पुर्‍याएको भन्दै खोप लगाउन छुटेका सबैलाई खोपको लागि फारम भर्न आग्रह गरेको हो ।

महामारीबाट सुरक्षित रहन नेपाल सरकारले तोकेको स्वास्थ्य सम्बन्धि मापदण्डहरू अनिवार्य रुपमा पालना गर्न गराउने आवश्यक व्यवस्था मिलाउन सम्बन्धित सबैलाई त्रिविले सुचनामार्फत आग्रहसमेत गरेको छ ।