काठमाडौँ– शेयर बजार नेप्से मंगलबार (आज) ६.५ अंकले घटेर २८ सय १६ दशमलव ५६ विन्दुमा झरेको छ ।

आज बैकिङ समूहको शेयर साढे २५ अंकले घटेको छ । यस्तै होटल समूहको २८ अंकले, फाइनान्सको झण्डै दुई अंकले, उत्पादनको साढे २२ अंकले र अन्य समूहको शेयर २९ अंकले घटेको छ । व्यापार, जलविद्युत्, माइक्रो फाइनान्स, जीवन बीमा र निर्जीवन बीमा समूहको शेयर भने बढेको छ ।

आज नेप्सेसँगै कारोबार रकम पनि घटेको छ । आज दुई सय १९ कम्पनीका दुई करोड ३४ लाख कित्ता शेयर ११ अर्ब १३ करोड रुपैयाँमा किनबेच भएका छन् । सबैभन्दा धेरै अरुण काबेली जलविद्युत् कम्पनीको ३३ करोड ८३ लाख रुपैयाँको शेयर कारोबार कारोबार भएको छ ।
आज मल्टिपर्पोज फाइनान्सको शेयर सबैभन्दा धेरै झण्डै साढे तीन प्रतिशतले घटेको छ । समग्र बजार घटे पनि वरुण हाइड्रो, माउन्टेन हाइड्रो, युनिभर्सल पावर र घलेम्दी हाइड्रोको शेयर झण्डै १० प्रतिशतले बढेको छ ।

ठूला कम्पनीको मापक सेन्सेटिभ इन्डेक्स ४.५१ अङ्कले घटेर ५०३.९९ बिन्दुमा झरेको छ । आजको कारोबारमा हाइड्रोपावर र बीमा समूह चम्किँदा परिसूचकमा गिरावट आए पनि कारोबार रकममा खासै ठूलो असर परेको छैन ।