झापा– ३ साता अघि भएको विवाहपछि कोरोना संक्रमित भएका झापाका एक नवदुलाहाको मृत्यु भएको छ ।

गौरादह ४ का ३० वर्षीय नवदुलाहाको उपचारका क्रममा शुक्रबार राति विराटनगरमा मृत्यु भएको नगरपालिका स्वास्थ्य शाखा प्रमुख पर्शुराम भट्टराईले जानकारी दिए ।

बैशाख १५ गते उनको विवाह भएको थियो भने विवाह पछि परिवारका अधिकांश सदस्यमा संक्रमण देखिएको थियो । संक्रमण पछि उपचारकै क्रममा गत वैशाख २३ गते दुलाहाकी आमाको मृत्यु भएको थियो ।

नवदुलहीको समेत हाल विराटनगरमा उपचार भईरहेको नगरपालिकाले जनाएको छ ।

साता भित्रै बाबु छोरोको मृत्यु
झापाको हल्दिबारीमा एकसाता भित्रै बाबु छोराको मृत्यु भएको छ । कोरोना संक्रमित हल्दिबारी १ का ३० वर्षीय पुरुषको शनिबार बिहान विर्तामोड स्थित अस्पतालमा मृत्यु भएको गाउँपालिका स्वास्थ्य शाखा प्रमुख पुष्कर निरौलाले जानकारी दिएका छन् ।

उनका बुवाको गत बैशाख ३० गते निधन भएको थियो । बुवामा कोरोनाको लक्षण देखिएको भए पनि पुष्टि भएको थिएन । तर परिवारका बाँकी सबै सदस्यमा संक्रमण देखिएको जनाईएको छ ।

वडाध्यक्षको निधन
कोरोना संक्रमित भएका झापाको मेचीनगर ७ का वडाध्यक्ष चन्दन मेचेको निधन भएको छ ।

उपचारकै क्रममा विर्तामोडस्थित विर्तासिटी अस्पतालको उनको मृत्यु भएको नगरपालिकाले जनाएको छ । उनलाई गत वैशाख २८ गते संक्रमण पुष्टि भएको थियो भने ५ दिन भेन्टिलेटरमा राखेर समेत उपचार भएको थियो । उनी मेचे समुदायका अगुवा पनि हुन् ।