काठमाडौँ– कोरोना भाइरसको महामारीविरुद्ध लड्न भारतलाई अहिलेसम्म ४० देशले विभिन्न प्रकारका सहयोग गरेका छन् ।

महामारीबाट अति नराम्रोसँग प्रभावित भएको भारतलाई ती देशहरूले कोरोना भाइरसको महामारीविरुद्ध जुध्न आवश्यक पर्ने सामग्रीहरू, उपकरण तथा औषधि पठाएका हुन् ।

सहयोग गर्ने देशहरूमा अमेरिका, रुस, बेलायत, फ्रान्स, जर्मनी, जापानलगायत रहेको पनि विदेश मन्त्रालयका अधिकारीहरूले जानकारी दिएका छन् ।

ती सहयोग सामग्रीहरू भारतीय रेडक्रस सोसाइटीमार्फत् भारत सरकारलाई उपलब्ध गराइएको भारतको विदेश मन्त्रालयले बिहीबार जनाएको छ ।

भारतमा अहिले फैलिएको दोस्रो चरणको महामारीका कारण दैनिक हजारौँको मृत्यु हुने गरेको छ भने लाखौं सङ्क्रमित हुने गरेका छन् ।

भारतमा बिहीबार मात्रै दुई लाख ७६ हजार ११० जना कोरोनाभाइरसबाट सङ्क्रमित भएका छन् । योसँगै भारतमा कुल सङ्क्रमितको सङ्ख्या दुई करोड ५७ लाख ७२ हजार ४४० पुगेको केन्द्रीय स्वास्थ्य मन्त्रालयले जनाएको छ ।