कालो जिरा, शताब्दीयौंदेखि पूर्वीय संस्कृतीमा भान्सामा मसलाका रूपमा प्रयोग हुँदै आएको छ । यसको सुगन्ध गरम मसलाको जस्तै हुन्छ । यसमा लिमोनिन, कार्बोन, कार्बिन, कार्बाकोल पनि मुख्य रूपमा पाइन्छ । यो स्वादमा मात्र नभई औषधिय हिसाबमा पनि प्रभावकारी मानिन्छ ।

आयुर्वेद अनुसार, कालो जीराको सेवनले भोक र उत्तेजना जगाउँछ । यसमा सुत्केरी आमाहरुमा दूध नआउने समस्यामा दुग्धवर्धक गराउने क्षमता हुन्छ । यसको नियमित सेवनबाट पेट दुख्ने, वाकवाक लाग्ने, भोक लाग्ने वा नलाग्ने, अपच हुने लगायतका स्वास्थ्यसम्बन्धी कठिनाइ पनि हट्छन् ।

कालो जीराको सेवन मुख्यतः महिलाका लागि लाभदायक हुने गर्दछ । मासिक स्रावको पीडाबाट छुटकारा गराउन यसको सेवन अत्यन्त उपयोगी हुन्छ । गठिया, लुतो, आर्थराइटिससहित पिसाब रोकिने, चिढचिडाहट हुने जस्ता समस्याको उपचारमा पनि यसको उपयोग हुन्छ । तर भुलेर पनि गर्भवती अवस्थामा कालो जीराको सेवन गर्न हुन्न ।