काठमाडौं– कथा संग्रह ‘सत्र पुष्प पत्रहरु’की लेखिका सुकृति शर्मालाई ‘ब्लूमक्विस्ट २०२१ वर्ष पुरस्कार’ प्रदान गरिएको छ । यो पुरस्कारको राशी ५ लाख ८४ हजार रुपैंयाँ छ ।

शर्मालाई ब्लूमक्विस्ट पारिवारिक छात्रवृत्ति कोषले यो पुरस्कार प्रदान गरेको हो । परिवार, विद्यालय र सामाजिक क्षेत्रमा योगदान गरेका फेयरफ्याक्स काउन्टी स्कूलअन्तर्गतका उत्कृष्ट बिद्यार्थीहरु मध्येबाट छानिने एक विद्यार्थीलाई वार्षिक रुपमा प्रदान गरिने उक्त पुरस्कारको राशी ५ हजार डलर छ ।

ब्लूमक्विस्ट पारिवारिक प्रतिष्ठानले धेरै लामो समय देखि कलेज एक्सेस फेयरफ्याक्सः ओपनिङ डोर टु द फ्युचर’ नामक संस्थामार्फत उक्त पुरस्कार प्रदान गर्दै आइरहेको कलेजद्वारा जारी विज्ञप्तीमा उल्लेख छ ।

सुकृतिले आफ्नो भाई साइमनसँग मिलेर कथासंग्रह ‘सत्र पुष्प पत्रहरु’ लेखेकी हुन् । यो कथा संग्रह अमाजनमार्फत बिक्री भइरहेको छ ।

उक्त पुस्तकलाई फेयरफ्याक्स काउन्टी पुस्तकालयले पाठक सदस्यहरुलाई अध्ययनका लागि आफ्ना सबै २३ वटा शाखामा उपलब्ध गराएको छ ।

उक्त पुस्तकबाट उठेको रकम नेपाल र लेबनान स्थित शरणार्थी शिविरहरूमा रहेका बालबालिकाहरूको स्वास्थ्य सेवाका लागि जाने गरेको कुरा सुकृतिले बताइन् ।