काठमाडौं– अन्नपूर्ण हिमाल आरोहण गरी फर्कने क्रममा उद्धार गरिएका एकजना मलेशियाली पर्वतारोहीको निधन भएको छ ।

सिङ्गापुरमा रहँदै आएका मलेशियाली आरोही तथा डाक्टर चिन वुई किनको सिङ्गापुरमा रहेको युनिभर्सिटी अस्पतालमा निधन भएको हो ।

८,०९१ मिटर उचाईको अन्नपूर्ण हिमाल आरोहण गरेर फर्कने क्रममा उनी अन्य आरोहीसँग छुट्टिएका थिए । त्यसको ४३ घण्टापछि गत बिहीबार उनलाई उद्धार गरिएको थियो ।

शुरुमा नेपालमै उपचार गराइएका उनलाई थप उपचारका लागि सिङ्गापुर लगिएको थियो । नेपालमै पनि चिकित्सकले उनको बच्ने सम्भावना कम रहेको जनाएका थिए ।

सिङ्गापुरको ङ्ग टेङ्ग फोङ्ग जनरल अस्पतालमा भिजिटिङ सिनियर एनेस्थेसियोलोजी कन्सल्टेन्टका रुपमा कार्यरत डा. चिन वुई किनले यसअघि सगरमाथाको पनि सफल आरोहण गरेका थिए ।