काठमाडौं–कुनै समय नेपाली फिल्मको छायांकन पछि त्यसको पोस्ट प्रोडक्सनको काम भारतको मुम्बईमा गरिन्थ्यो । अहिले त्यसको ठिक विपरित सबै काम नेपालमै गरिन्छ ।

पछिल्लो समयमा नेपालमा निर्माण भएका केही फिल्मले भारतमा प्रदर्शनको प्रयास गरिरहेका छन् । यही क्रममा सन्तोष सेनको फिल्म ‘प्रेमगीत ३’ र निर्माता तथा निर्देशक मिलन चाम्सको फिल्म ‘वीर विक्रम २’ भारतमा प्रदर्शनका लागि कम्मर कसेर लागेका छन् ।

निर्देशक चाम्सकाअनुसार उनले भारतका थिएटरमा ‘वीर विक्रम २’ रिलिज गर्न दुई वर्ष अगाडि मुम्बईमा फिल्मको हिन्दी डबिङ गरेका थिए । ‘हामीले कोरोना अघि नै भारतमा फिल्म प्रदर्शनको तयारी गरेका थियौं । तर महामारीका कारण त्यो तयारीलाई पूर्णता दिन पाएनौं’, निर्देशक चाम्सले भने ।

उनले भारतीय यूट्युब च्यानलबाट फिल्म रिलिज गर्ने बताए । एक महिनाभित्र फिल्मको हिन्दी डब यूट्युबमा रिलिज हुने चाम्सको भनाई छ । भारतमा दर्शकको संख्या उल्लेख्य रहेकाले पनि फिल्म मनपराउनेमा उनी आशावादी छन् ।

उनले आफ्नो फेसबुकमा अभिनेत्री वर्षा सिवाकोटी र अभिनेता पल शाहबीचको संवाद हिन्दीमा स्वरांकन भएको दृश्य शेयर गरेका छन् ।

बाल्यकालदेखिका दुई साथीको भावनात्मक सम्बन्धको कथा बोल्ने फिल्ममा नाजिर हुसेन, बुद्धि तामाङ, देशभक्त खनाल, विनिशा भण्डारीलगायतको अभिनय छ ।