काठमाडौँ– काठमाडौँको वसन्तपुर क्षेत्रमा दिउँसो ३ बजेदेखि मानिसहरु भेला हुन थाल्छन् । मानिसहरुको संख्या बढ्दै ४ बजेसम्म २-३ सयभन्दा बढी हुन्छ ।

निषेधाज्ञाको समयमा बिहान–बेलुका छाक टार्न समस्यामा परेकाहरु ४ बजे स्वयमंसेवकहरुले वितरण गर्ने खाना खानकै लागि  त्यहाँ जम्मा हुने गर्छन् ।

जब घडीमा ४ बज्छ । ‘बन्दी सहायता नेपाल’ की इन्दिरा राणा ट्याक्सीमा खाना र पानी लिएर आइपुग्छिन् । त्यसपछि उनीहरु खाना पाउने खुसीमा जुरुक्क उठ्छन् र लाग्न थाल्छन लाइनमा ।

न भौतिक दूरी कायम छ । न त सबैले मास्क नै लगाएका हुन्छन् । लाइनमा बालबालिकादेखि वृद्धवृद्धासम्म उभिन्छन् ।

नयाँ भेरियन्टसहितको कोरोना माहामारीका कारण काठमाडौंमा अहिले निषेधाज्ञा जारी छ । सर्वसाधरणलाई घरबाट बाहिर नआउन सरकारले पटकपटक अनुरोध गरिरहेको छ ।

त्यसो त कोरोना भाइरस संक्रमणको त्रास उनीहरुमा नभएको भने होइन । ‘भोको पेटले सताएपछि भाइरसको डर हराउने रहेछ’ भीडमा उभिएकी एक महिलाले भनिन् ।

विशेषगरी दिनभरी भारी बोक्ने मजदुर हातमा नाम्लो बोकरै लाइनमा बसिरहेका थिए ।

त्यहाँ ४ बजे विभिन्न समूहले खाना खुवाउन शुरु गर्ने हुँदा उनीहरु दिउँसो १/२ बजेबाट बसन्तपुर आसपास आएर बस्न थालेका हुन्छन् ।
निषेधाज्ञा सुरुभएसँगै भारी बोक्ने काम नपाएको र बिहान बेलुका खाना खानकै लागि वसन्तपुर पुगेको ललितपुरका इशान तामाङले बताए ।

‘पहिले त काम पाइन्थ्यो, बिहान बेलुका खाना पुग्थ्यो अहिले त काम नै छैन त्यसैले यहाँ खाना खुवाउँछ भन्ने सुनेर आएको’, उनले भने ।

लाइनमा बसेर हातमा खानाको प्याकिङ पाइसकेकाहरु खुसी देखिन्थे भने नपाएकाहरु आतुर… ।

कोही घर परिवारका लागि प्लाष्टिकको झोलामा खाना र पानी प्याकिङ गरेरै समेत जाने गरेका छन् ।

‘बन्दी सहायत नेपाल’ र ‘सामूहिक सशक्तीकरण’ नामक गैरसरकारी संस्थाले सुरुमा स्यानिटाइजर, मास्क बाँड्दै खानासँगै पानी वितरण गर्ने गरेको छ ।

संस्थाले बुधबार मात्र २ सय बढीलाई खाना खुवाएको जानकारी दियो ।