काठमाडौँ– प्रधानमन्त्री केपी शर्मा ओलीले काठमाडौँमा रहेका ठूला अस्पताललाई कोभिड अस्पताल बनाउने घोषणा गरेका छन् ।

देशवासीका नाममा सम्बोधन गर्दै प्रधानमन्त्री ओलीले कोरोना महामारी नियन्त्रणका लागि निषेधाज्ञालाई कडा बनाउन लागिएको भन्दै काठमाडौंमा रहेका ठूला अस्पताललाई कोभिड अस्पताल बनाउने घोषणा गरेका हुन् ।

‘वीर अस्पतालको नयाँ भवन र नेपाली सेनाको त्रिचन्द्र मिलिटरी अस्पताल लगायत काठमाडौँ उपत्यकाका धेरै शैय्या भएका मेडिकल कलेज, ठूला सरकारी तथा नीजि अस्पतालहरु कोभिड अस्पतालका रुपमा सञ्चालन गरिनेछ,’ प्रधानमन्त्रीले भने ।

उनले भने,‘प्रदेश सरकारले पनि उक्त प्रदेशमा रहेका मेडिकल कलेज र ठूला अस्पताललाई कोभिड अस्पतालका रुपमा र साना अस्पताललाई नन कोभिड अस्पतालका रुपमा सञ्चालन गरिनेछ ।’

प्रधानमन्त्री ओलीले स्वास्थ्यका क्षेत्रमा सरकारले पछिल्लो एक वर्षमा उल्लेखनीय सुधारका काम गरेको दाबी समेत गरेका छन् ।