नवलपुर– दुई दिनको अन्तरालमा पश्चिम नवलपरासीमा कोरोना संक्रमित बुवा र छोराको मृत्यु भएको छ ।

सदरमुकामस्थित रामग्राम नगरपालिका ९ का ३५ बर्षीय पुरुषको मंगलबार विहान साढे ८ बजे कोरोना संक्रमणको कारण मृत्यु भएको पश्चिम नवलपरासीका प्रमुख जिल्ला अधिकारी धमेन्द्र मिश्रले बताए ।

उनलाई स्वास फेर्न गाह्रो भएपछि पृथ्वीचन्द्र अस्पतालमा भर्ना गरिएको थियो । उनको अवस्था जटिल बन्दै गएपछि आइसियुमा राखेर उपचार गर्नु पर्ने भएकोले रुपन्देहीको भीम अस्पताल र बुटवलको कोरोना विशेष अस्पतालमा प्रयास गरिए पनि स्थान अभावकै कारण समयमै उपचार नपाउँदा उनको मृत्यु भएको हो ।

मंगलबार विहान साढे ८ बजेतिरको समयमा उनको निधन भएको प्रमुख जिल्ला अधिकारी मिश्रले जानकारी दिए ।

दुई दिनअघि मात्रै उनका बुवाको कोरोनाकै कारण घरमा मृत्यु भएको थियो । योसहित पश्चिम नवलपरासीमा कोरोनाका कारण कारण ज्यान गुमाउनेको संख्या ३८ पुगेको छ ।