मुम्बई–फिल्म ‘आशिकी’मा सम्झनालायक संगीत दिने संगीतकार जोडी नदीम–श्रवणमध्ये श्रवण राठौडको बिहीबार बेलुका निधन भएको छ । दुई दिन पहिलो मात्र उनलाई कोरोना संक्रमण भएको थियो ।

दैनिक भास्करमा प्रकाशित समाचारअनुसार उनलाई मधुमेह थियो । कोरोना संक्रमणका कारण उनको फोक्सो पूर्ण रुपमा संक्रमित भएको थियो । उनको उपचार रहेजा अस्पतालमा भइरहेको थियो ।

उनको मृत्युको रहेजा अस्पतालका डा. कीर्ति भूषणले पुष्टि गरेका छन् । ‘श्रवणको निधन बेलुका ९ बजेर ३० मिनेटमा भयो । हामीले आफ्नोतर्फबाट उनलाई बचाउन हरेक प्रयास गर्यौ । तर सफल हुन सकेनौं । उनको मृत्युको कारण कोभिड संक्रमणको कारण भएको कोर्डिायोमायोपेथीबाट भएको हो । जसकारण उनको पल्मोनरी एडिमा र अन्य अंग फेल भएका थिए’, उनले भनेका छन् ।

श्रवण सन् ९० को दशकका चर्चित संगीतकार थिए । उनले नदमीका साथ मिलेर कैयौं फिल्ममा उत्कृष्ट संगीत दिएर आफ्नो ख्यातीलाई बढाएका थिए ।

यो जोडीले सन् १९७७ मा पहिलोपटक भोजपुरी फिल्म ‘दंगल’का लागि संगीत दिएका थिए । यो फिल्मको गीत ‘काशी हिले पटना हिले’ निकै चर्चित बनेको थियो ।

जोडीले पहिलोपटक बलिउड फिल्म ‘जीना सीख लिया’का लागि संगीत दिएका थिए ।

जोडीले ‘आशिकी’, ‘साजन’, ‘दिल है कि मानता नहीं’, ‘सड़क’, ‘सैनिक’, ‘दिलवाले’, ‘राजा हिन्दुस्तानी’, ‘फूल और कांटे’ र ‘परदेस’ जस्ता फिल्ममा संगीत दिएका थिए ।

सन् २ हजारको दशकमा ‘ये दिल आशिकाना’, ‘राज’, ‘कयामत’, ‘दिल है तुम्हारा’, ‘बेवफा’ र ‘बरसात’ जस्ता फिल्ममा संगीत दिएका थिए ।