काठमाडौँ– जर्मनीमा निधन भएका नेपाली युवक विक्रम शर्मा ज्ञवालीको अन्त्येष्टि बिहीबार हुने भएको छ ।

हृदयघातका कारण गत अप्रिल ११ मा उनको आफू बस्ने फ्ल्याटमा निधन भएको थियो । उनी जर्मनीमा नेपालीले सञ्चालन गरेको रेष्टुरेन्टमा कुकको काम गर्दै आएका थिए ।

४१ वर्षीय शर्मा दुई वर्ष पहिले परिवारसहित इटालीबाट जर्मनी आएका थिए। शर्माकी आफन्त रमा लामिछानेका अनुसार काम सकेर घर आएपछि फुटबल खेल हेरेर सुतेका उनलाई बिहान बेहोस अवस्थामा फेला पारिएको थियो ।

बेहोस अवस्थामै अस्पताल पुर्‍याएका उनलाई चिकित्सकको टोलीले मृत घोषणा गरेको थियो ।

नेपालस्थित रुपन्देहीको बुटबल घर भएका शर्माकी आमा, श्रीमती र १८ वर्षीय एक छोरा छन्। नेपालबाट आमाले जर्मनीमै दाहसंस्कार गर्न अनुमति दिएकाले हिन्दु परम्परा अनुसार बिहीबार अन्त्येष्टि गरिने परिवारजनले जनाएका छन्।