काठमाडौं– कोरोना महामारीपछि नेपालमा सुरु भएको डिजिटल प्लेटफर्म ‘सिनेमाघर’ एप अब अमेजन फायर टिभीमा पनि उपलब्ध हुने भएको छ ।

अभिनेता खगेन्द्र लामिछाने र सागर खरेलको समूहले सुरु गरेको यो प्लेटफर्ममा ५ सय तिरेर वर्षभरी नेपाली फिल्म, वेव सिरिज, स्ट्यान्ड अप कमेडी, सर्ट मुभिज हेर्न पाइने सुविधा छ ।

अमेजन फायर टिभीमा विश्वभरको ५ करोडभन्दा बढी डिभाइस रहेको छ । ‘अमेजन फायर टिभी’ को जति पनि स्मार्ट डिभाइसहरु छन्, त्यसमा अब ‘सिनेमाघर’ चल्नेछ । जसले गर्दा ठूलो स्क्रीनमा फिल्म हेर्न सजिलो हुनेछ । यसबाट हाम्रो ग्राहक बढ्नेमा पनि विश्वस्त छौं ।’ सञ्चालक खरेल भन्छन् ।

भारतसँगै अमेरिका, यूरोप, अष्ट्रेलिया लगायतका देशमा निकै पपुलर रहेको अमेजनको फायर डिभाइसमा नेपालका थोरै मात्र एप्लिकेशन उपलब्ध छन् ।

विदेशमा बस्ने धेरै नेपालीले अमेजन टिभीको स्मार्ट डिभाइस प्रयोग गर्ने भएकाले अब ‘सिनेमाघर’ को ग्राहक बढ्ने सञ्चालक खरेलको भनाई छ ।

हाल यो एपमा ‘डमरुको डन्डीबियो’, ‘कोहलपुर एक्सप्रेस’, ‘सरौतो’, ‘मंगलम’, ‘बबी’, ‘ब्लाइन्ड रक्स’, ‘कथा काठमान्डू’लगायतका फिल्म हेर्न सकिन्छ ।