काठमाडौं- एएफसी कपमा नेपालको लिग च्याम्पियन क्लब मनाङ मर्स्याङदीले भारतीय क्लब मिनर्भा पञ्जावसँग अंक बाडेको छ। बुधबार बेलुकी भएको खेलमा मनाङले घरेलु टोली मिनेर्भासंग २-२ गोलको बराबरी खेलेको हो । भुवनेश्वरस्थित कालिङ्गा रंगशालामा भएको खेलमा अग्रता लिएको मिनर्भाविरुद्द मनाङका अभिषेक रिजाल र एडिलाजा सोमीडेले समान एक – एक गोल फर्काए।

मिनेर्भाका लागि श्रेयस गोपालन र करीम नुरेनले एक- एक गोल गरेका थिए । खेलको आठौं मिनेटमा घरेलु टोली मिनर्भाका श्रेयसले गोल गर्दै घरेलु टोलीलाई अग्रता दिलाए।

खेलको ४० औं मिनेटमा मनाङले पेनाल्टीको अवसर पाएको थियो । तर, सुजल श्रेष्ठले पेनाल्टीमा गोल गर्न चुक्दा मनाङले बराबरी गर्ने मौका गुमायो ।

दोस्रो हाफमा भने मनाङ खेलमा फर्कियो । खेलको ६९ औं मिनेटमा अभिषेकले गोल गर्दै मनाङलाई १-१ गोलको बराबरीमा फर्काए ।

खेलको ८६ औं मिनेटमा मिनेर्भाका नुरेनले पेनाल्टीमा गोल गर्दै घरेलु टोलीलाई २-१ को अग्रता दिलाए । तर, खेलको ९० औं मिनेटमा सोमीडेले गोल गरेपछि मनाङले २-२ गोलको बराबरी खेलेको हो । एएफसी कपको तेस्रो खेलमा गएर मनाङले अंक तालिकाम १ अंक जोड्न सफल भएको हो।