काठमाडौं– यही वैशाख १० गतेदेखि वैशाख १२ गतेसम्म काठमाडौंमा आयोजना हुने नवौं संस्करणको ‘नेपाल–अफ्रिका फिल्म फेस्टिभल–२०२१(नाफ)’मा नेपालका सात वटा फिल्म प्रदर्शन हुने भएका छन् ।

जमलस्थित राष्ट्रिय नाँचघरमा हुने फेस्टिभल कलेज अफ जर्नालिज्म एण्ड मास कम्युनिकेसनले आयोजना गर्न लागेको हो ।

फेस्टिभल निर्देशक डब्बु क्षेत्रीले सात फिल्ममध्ये एक वृत्तचित्र र बाँकी सर्ट फिल्म रहेको बताए । फेस्टिभलमा नेपालको तर्फबाट निर्देशक गणेश पाण्डेको ‘को हज्बेन्ड’, हिमाल उप्रेतीको ‘आमा’, माधवराज खरेलको ‘दुर्गामान्डु’, गणेशजंग रावलको ‘सम्साया’, सजल लोप्चनको ‘गाइड’, पुरुषोत्तम बस्नेतको ‘सुरक्षा’, निपिल शर्माको ‘द फाइनल फेयर वेल’ र युनिषराज उप्रेतीको ‘बाटोमा’ प्रदर्शन हुनेछन् ।

महोत्सव अध्यक्ष डा. मञ्जु मिश्रले फेस्टिभलमा नेपाल र अफ्रिकाको फिल्म एवं संस्कृतिको बारेमा एक दिने बहस हुने बताइन् । उनका अनुसार गत डिसेम्बरमा हुनुपर्ने फेस्टिभल कोभिड १९ का कारण वैशाखमा आयोजना गर्न लागिएको हो ।

फेस्टिभलमा नेपाल र अफ्रिकाका गरी १८ वटा लामाछोटा फिल्म देखाइनेछन् । फेस्टिभलमा जिम्बावेबाट ‘गुड म्यान’, ‘थन्डिज डायरी’, इजिप्टबाट ‘बबल्स’, ‘ड्राई हट समर’, ‘एक्जिट’ र ‘द स्पारो किड्स’, निमिभिया र ब्राजिलबाट ‘बडी गेम्स’, स्विट्जरल्यान्ड र रुवान्डाबाट ‘इम्फुरा’, तान्जानिया र चीनबाट ‘तजारा’ र सेनेगलबाट ‘गोल्डेन फिस’ छानिएका छन् ।