शुकदेवलाई उनका बुवाले महाराज जनककोमा गएर दीक्षा ग्रहण गर्न परामर्श दिए । बुवाको परामर्शअनुसार शुकदेव महाराज जनकको दरबारमा पुगे र दीक्षा प्रदान गर्न अनुरोध गरे ।

महाराज जनकले दीक्षा दिनुभन्दा अगाडि शुकदेवको परीक्षा लिँदै उनको हातमा दूधले भरिएको कचौरा दिए र भने— यो कचौरा हातमा लिएर मिथिला नगर घुमेर आउनू । तर ध्यान राख, कचौराबाट दूधको एक थोपा पनि झर्न नपाओस् ।

आज्ञाअनुसार शुकदेवले दूधको कचौरा होशियारपूर्वक समातेर मिथिला नगर घुमाएर आए । यो देखेर महाराज जनक एकदमै खुशी भए । उनले शुकदेवलाई सोधे— तिमीले मिथिला घुमेर आउँदा के के देख्यौ ?

शुकदेवले भने— महाराज, मैले मिथिला पूरै घुमेर आए पनि केही हेर्न सकिनँ । कसैगरी यो नपोखियोस् भनेर मेरो पूरा ध्यान दूधको कचौरामा थियो ।

महाराज जनकले भने— यही एकाग्रता योग हो । यसलाई जीवनभर सम्हालेर राख । यही मेरो दीक्षा हो ।

साभार : ‘विश्वका उत्कृष्ट प्रेरक प्रसङ्गहरु’ पुस्तकबाट