काठमाडौं– भारतमा चक्रवात फानी ओडिशा–आन्ध्र प्रदेश तर्फ अघि बढेपछि नेपालमा पनि त्यसले प्रभाव पार्न सक्ने देखिएको छ ।

मौसम पूर्वानुमान महाशाखाका अनुसार बंगालको खाडीको दक्षिण पूर्वी भागमा भएको धेरै शक्तिशाली चक्रवात‘फानी’ विस्तार उत्तर–पश्चिम तिर अघि बढिरहेको छ ।

शुक्रबारबाट यो प्रणाली भारतको ओडिसा आसपास तिर मेडिने देखिएको सम्भावना रहेको मौसमविद्हरु बताउँछन् ।

मौसम पूर्वानुमान महाशाखाका अनुसार यो चक्रवात ‘फानी’ शुक्रवार अपराह्नपछि नेपालको पूर्वी भूभाग नजिक हुँदै उत्तर– उत्तर पूर्व जाने क्रममा रहेन पूर्वानुमान गरेको छ ।

उक्त चक्रवात नेपाल तर्फ आउने सम्भावना अहिलेसम्म नदेखिएता पनि नेपालको पूर्वी र मध्य हिमाली भूभागमा भारी हिमपात तथा प्रि मनसुन भएकोले पूर्वी र मध्यका स्थानहरुमा हावाहुरीसहित हल्का देखि मध्ययम वर्षा हुन सक्ने सम्भावना रहने मौसम पूर्वानुमान महाशाखाले जनाएको छ । महाशाखाले सतर्क रहनसमेत आग्रह गरेको छ ।

भारतीय मौसम विभागलेसमेत सतर्क रहन आफ्ना नागरिकलाई आग्रह गरेको छ । भारतको उत्तर प्रदेशमा फानी चक्रावतका कारण ३० देखि ४० किलोमिटर प्रतिघन्टाको गतिले हावा चल्नसक्ने अनुमान भारतीय मौसम विभागले गरेको छ ।

भारतीय मौसम विभागले मंगलबार राति लगभग २१ किलोमिटर प्रति घन्टाको रफ्तारमा हावा उत्तर पश्चिम तर्फ अघि बढिरहेको जनाएको छ ।