दोहा- गैरआवासीय नेपाली संघ अन्तर्राष्ट्रिय समन्वय परिषद्, मध्यपूर्व क्षेत्रीय युवा विभागले ‘ग्लोबल एनआरएन सिंगिङ आइडल, सेकेण्ड जेनेरेशन – २०२१’ को पहिलो सिजन आयोजना गर्ने भएको छ ।

नेपाली कला, संस्कृतिको संरक्षण एवं प्रवासमा बसेर संगीत साधना गरिरहेका नेपाली प्रतिभाहरूलाई पहिचान एवं प्रवर्द्धन गर्ने उद्देश्यले ‘ग्लोबल एनआरएन सिंगिङ आइडल सेकेण्ड जेनेरेशन – २०२१’ को आयोजना गर्न लागिएको युवा विभागले जनाएको हो ।

गैरआवासीय नेपाली संघ (एनआरएनए) मध्यपूर्व क्षेत्रीय युवा विभागले भर्चुअल माध्यमबाट उक्त कार्यक्रमको आयोजना गर्ने जनाएको हो । कार्यक्रमका व्यवस्थापक समेत रहेका एनआरएनए मध्यपूर्व क्षेत्रीय समितिका युवा संयोजक राज रेग्मीका अनुसार यस आइडलमा ८३ देशका गैरआवासीय नेपाली सहभागी हुन पाउनेछन् ।

आगामी अप्रिल १६ र १७ मा सञ्चालन गरिने उक्त प्रतियोगिताको विजेताले दुई लाख रुपैयापुरस्कार प्राप्त गर्ने छन् ।
द्वितीय पुरस्कार एक लाख रुपैयाँ, तृतीय पुरस्कार ५० हजार रुपैयाँ र चौथो हुनेले २५ हजार रुपैयाँ प्राप्त गर्ने रेग्मीले बताए । ग्राण्ड फिनालेमा प्रवेश पाउने ५ जना प्रतियोगीलाई गीति एल्बममा अवसर प्रदान गरिने उनले बताए ।

कार्यक्रममा गायक उदय सोताङ, गायिका सुनिता दुलाल, गायक विजय लामा र प्राश्ना शाक्य निर्णायक भूमिकामा रहने छन् ।