काठमाडौँ– सामाजिक सञ्जालको प्रयोगले धेरैलाई भुल्याउने गरेको छ । आपराधिक घटनामा सामाजिक सञ्जालको प्रयोग बढ्ने गुनासो पनि आउने गरेको छ । सँगै सामाजिक सञ्जालकै प्रयोगबाट अपराधीलाई कानूनी कठघरामा उभ्याउन पनि सहज भएको छ ।

यही सामाजिक सञ्जालबाटै सडकमा निर्घात कुटपिट भएको घटना सार्वजनिक भएको छ । सँगै घटनामा संलग्नलाई प्रहरीले नियन्त्रणमा लिएको छ ।

यस्तो थियो घटना

काठमाडौँको गोंगबुमा हिजो बिहान एकजना मान्छेलाई सडकमा निर्घात कुट्दै गरेको भिडियो फेसबुकमा लाइभ अपलोड भयो ।

तर,नेपाल प्रहरीले कुटपिटमा संलग्न तीन जनालाई आधा घण्टामा पक्रेर अभद्र व्यवहारको अभियोगमा कारबाही अघि बढाएको छ । काठमाडौँ प्रहरी परिसरका एसएसपी अशोक सिंहको कमाण्डमा खटिएको टोलीले आधा घण्टामा तीन जनालाई समातेको हो ।

तनहुँ घर भएका तर बनस्थली बस्ने वर्ष २२ का भरत गुरुङ,ढुंगेधारा बस्ने वर्ष २५ का सोमबहादुर गुरुङ र धापासी बस्ने वर्ष २५ का दीपेन्द्रकुमार थापाले सुनसरी घर भई गोंगबु बस्ने अमर लिम्बूलाई निर्घात कुट्दै ‘आफ्नो उक्त पौरख’ फेसबुकमा लाइभ गरेका थिए ।

उनीहरूले आफ्नी श्रीमतीलाई जिस्काएपछि लिम्बूले किन जिस्काएको भनेर बिरोध गर्दा तीनैजनाले एक्कासी लिम्बूमाथि प्रहार गर्दै सडकमा निर्घात् कुटेका हुन् ।