लसएञ्जल्स– क्याप्टेन ज्याक स्पेरोको चरित्रमा सारा विश्वमाझ चिनिएका हलिउड अभिनेता जोनी डेपको घरमा एक अनौठो घटना भएको छ ।

हलिउड हिल्समा रहेको यी अभिनेताको घरमा एक अज्ञात व्यक्ति पसेर त्यहाँ रहेका केही खाने कुरा खाएका छन् ।

जीन्यूजमा प्रकाशित समाचारअनुसार छिमेकीले जोनीको घर पछाडि रहेको स्वीमिङ पुलमा एक व्यक्ति टहलिँदै गरेको देखेपछि प्रहरीलाई खबर गरेका थिए ।

छिमेकीले प्रहरीलाई खबर गर्नासाथ ती व्यक्ति गेटबाट हामफालेर घरभित्र पसेका थिए ।

प्रहरी जोनीको घरमा पुग्दा ती व्यक्ति नुहाइरहेका थिए । जसकारण उनले प्रहरीले ढोका खोल्नका लागि गरेको आग्रह अस्वीकार गरे ।

ती व्यक्तिले जोनीको घर भित्र रहेको मदिराको स्वाद पनि लिएका थिए । केही समयपछि पक्राउ परेका ती व्यक्तिलाई प्रहरीले ढोका फोडेर घरभित्र पसेको आरोपमा मुद्धा दर्ता गराएको छ ।

यसअघि गत जनवरीमा एक अज्ञात महिला जोनीको घरमा पसेकी थिइन् ।