काठमाडौँ – नेकपा एमालेका वरिष्ठ नेता माधवकुमार नेपालले नेकपाको नाम विवादमा सर्वोच्चले गरेको फैसला जन्मिएको बच्चा मान्दिन फेरि गर्भमा लिएर जाउ भनेजस्तो भएको प्रतिक्रिया दिएका छन् ।

शनिबार आफू निकट युवाहरूको भेलालाई सम्बोधन गर्दै नेता नेपालले सर्वोच्च अदालतको फैसलालाई चुनौती दिनेगरी अभिव्यक्ति दिएका हुन् । उनले बाध्य भएर सर्वोच्च अदालतको फैसला कार्यान्वयन गर्नुपरेको बताए ।

‘सर्वोच्च अदालतले फैसला गरेछ, दुईवटा पार्टीले निर्णय गरे पनि, नेपाल कम्युनिस्ट पार्टी (नेकपा) बनाए पनि हामी मान्दैनौँ, तिमीहरू पुरानै ठाउँमा फर्क भनेर फैसला गरिदिएछ, यो जन्मिएको बच्चा मान्दैनौँ फेरि गर्भमा लिएर जाउ भनेजस्तै फैसला हो,’ उनले भने,‘बच्चा जन्मिसकेको छ, नयाँ संगठन अस्तित्वमा आइसकेको छ, त्यो मान्दिन भन्दियो सर्वोच्च अदालतले, अब हामीले असहमति भएपनि सर्वोच्चको फैसला लागु गर्दिन भन्न मिल्दैन । बाध्य भएर हामीले त्यसलाई लागु गर्नुपर्ने भइराछ ।’

सर्वोच्चको फैसला अनुसार आफूहरू एमालेमै जाने नेता नेपालले प्रष्ट पारे । उनले आफूहरू प्रधानमन्त्री केपी शर्मा ओलीमा नजानेसमेत बताए । उनले भने,‘ ओली पनि एमालेमा फर्कने हो, एमालेको पुरानो संगठन ब्युँताउने हो तर ओलीले यसलाई मान्न तयार देखिएन ।’