मुम्बई– कैयौं बलिउड फिल्ममा सुपरहिट गीत दिएकी गायिका अलका याग्निक ५५ वर्ष पुगेकी छन् । उनको जन्म २० मार्च, १९६६ मा कोलकातामा भएको थियो ।

दैनिक भास्करले यी गायिकाको जन्मदिनको अवसर पारेर एक किस्साको बारे समाचार लेखेको छ । जुन किस्सालाई सम्झिएर अहिले पनि अलका खुबै हास्छिन् ।

८० देखि ९० को दशककी गायिका अलकाले फिल्म ‘कयामत से कयामत तक’मा जुही चावलाका लागि गीत गाउनुपर्ने थियो । त्यो समय उनी फिल्म ‘तेजाब’को गीत गाएर लोकप्रिय भइसकेकी थिइन् ।

जोकोही संगीतकार पनि अलकासँग गीतको सहकार्य गर्न चाहन्थे । एकदिन एक रेकर्डिङ स्टुडियोमा आएर गीत गाइरहदा एक युवक उनको अगाडि आएर बसे ।

अलकाले गाइरहँदा त्यो युवकले उनलाई घुरेर हेरिरहेको थिए । युवकको व्यवहार देखेर अप्ठ्यारो महशुस गरेकी उनले ती युवकलाई रेकर्डिङ स्टुडियो बाहिर जान आदेश दिइन् । आदेश पाउनासाथ ती युवक बाहिर निस्किए ।

रेकर्डिङको काम सकिएपनि नासिर हुसेनले अलकालाई फिल्मको कलाकारसँग भेट्नका लागि प्रस्ताव गरे । ती कलाकारमा जूही चावला र आमिर खान पनि थिए ।

आमिर र जुही त्यो समयमा नयाँ भएकाले अलकाले उनीहरुलाई चिनेकी थिइनन् । जुही र अलकाको पहिलो भेट त्यही स्टुडियोमा भएको थियो । तर जब आमिरको पालो आयो, अलकाले आमिरलाई चिनिहालिन् । किनकी अलकाले स्टुडियोबाट निकालेका युवा आमिर नै थिए ।

त्यसपछि अलकाले हाँस्दै ‘सरी’ भनिन् र आमिरले ‘ओके’ भनेपछि उनीहरुबीचको कुरा मिल्यो । अहिले पनि आमिरसँग अलकाको कहिँकतै भेट भइहाल्यो भने यो घटना सम्झेर हास्ने गर्छिन् ।