काठमाडौं–मोडलिङ प्रतियोगिता ‘मोडल हन्ट नेपाल सिजन ६’ अर्थात ‘मोडल हन्ट नेपाल २०२१’मा ३५ युवा र ३३ युवती गरी ६८ जना प्रतिष्पर्धी छनोट भएका छन् । प्रतियोगिताको फिनाले चैत १४ मा हुँदैछ ।

प्रतिष्पर्धीहरुलाई कोरियोग्राफर रोजिन शाक्यले र्‍याम्प मोडलिङका विविध आयाम र व्याकरणदेखि स्टेज प्रस्तुतिकरणका विषयमा प्रशिक्षण दिइरहेका छन् ।

त्यस्तै माल्भिका सुब्बा, थेन्डुप शेर्पा, सुवर्ण खड्का, सुजन श्रेष्ठ र लुजा मेकअप स्टुडियोले फेसन सजगता, स्टाइलिङ, मेकअपको ज्ञान, संचार कला र बडी ल्याङ्ग्वेज, व्यक्तित्व विकास, फिटनेस, फोटोसुट लगायत विषयमा प्रशिक्षण दिदैछन् ।

रवि धमला र एत्ना पाण्डेको निर्देशनमा सञ्चालन हुने प्रतियोगिताको फिनाले अन्तर्राष्ट्रिय स्तरको रनवे सेटमा सोही अनुरुप सञ्चालन हुनेछ ।

नेक्स्ट मोडल्स नेपाल आयोजक रहेको प्रतियोगिताका सहभागी ग्राण्ड फिनालेमा आईसी कलेज अफ आर्ट एण्ड फेसनका विद्यार्थी फेसन डिजाइनहरुसहित इन्टा अटायरका फेसन डिजाइनर इन्टा श्रेष्ठले तयार पारेको सुन्दर र विशिष्ट पहिरनमा र्याम्प नाप्नेछन् ।

प्रतियोगिताका विजेताले कोरियामा हुने ‘एलबीएमए अवार्ड’, गोवामा मे महिनामा आयोजना ‘गोवा फेसन वीक’लगायतका प्रतियोगितामा सहभागिता जनाउन पाउनेछन् ।