प्रसिद्ध चिकित्सक अमरनाथ झा समयको पालना गर्ने मानिस थिए । एक पटक उनी एउटा साहित्यिक गोष्ठीका लागि पटना गएका थिए । उनलाई गोष्ठीको मुख्य अतिथि बनाइएको थियो । निमन्त्रणा स्वीकार गर्दै झाले आयोजकसँग भने— निर्धारित समयमा अर्थात् ५:३० बजे कसैलाई निवासस्थानमा लिन पठाउनू ।

डाक्टर झा ५:३० बजे नै तयार भएर बसे । तर उनलाई लिन आउने मानिस ६:०० बजेपछि मात्र आइपुगे । आउनेबित्तिकै ढिला भएकोमा क्षमा मागे ।

डाक्टर झाले उनको क्षमायाचनाको वास्तै गरेनन् । गोष्ठीमा जान ठाडै अस्वीकार गरिदिए । आयोजकले धेरै आग्रह गरे । तपाईं जानुभएन भने हाम्रो गोष्ठी असफल हुनेछ भनेर अनेकौँ पटक हारगुहार गरे ।

अमरनाजले नम्रतापूर्वक जवाफ दिए— तपाईंको गोष्ठी असफल हुँदै गरेकोमा म खेद व्यक्त गर्छु । तर ढिलो गएर काम गर्नु मेरा लागि स्वीकार्य छैन ।

साभार  : ‘विश्वका उत्कृष्ट प्रेरक प्रसङ्गहरु’ पुस्तकबाट