एउटा पार्टीमा बनार्ड शाको एक युवतीसँग भेट भयो । उनी अत्यन्त महँगा–महँगा पोशाकमा सजिएर आएकी थिइन् । ती युवतीले शालाई सोधिन्— ‘तपाइँलाई मेरो उमेर कति भयो जस्तो लाग्छ ?’

शाले केही क्षणसम्म त्यस युवतीलाई तलदेखि माथिसम्म नियाले र भने— ‘दाँत हेर्ने हो भने तपाईंको उमेर १८ वर्ष भन्नुपर्ला, कपाल हेर्दा १९ वर्ष र तपाईंको हाउभाउ तथा चालढाल हेर्दा १४ वर्षको भनेर अनुमान गर्न सकिन्छ ।’

युवतीले मख्ख पर्दै भनिन्— ‘तपाइँका यी विचारका लागि धन्यवाद । तर म यस विषयमा तपाइँको एउटै विचार जान्न चाहन्छु ।’

‘हेर्नुस्, मैले एउटै विचार सुनाएको हुँ । सायद, तपाईंले बुझ्न सक्नु भएन । १८, १९ र १४ लाई जोड्नुस्, तपाईंले मेरो अन्दाज थाहा पाउन सक्नुहुनेछ ।’ — शाले जवाफ दिए ।

साभार : ‘विश्वका उत्कृष्ट प्रेरक प्रसङ्गहरू’ पुस्तकबाट