काठमाडौं– सन् २०२० की ‘मिस युनिभर्स नेपाल’ अंशिका शर्माले आफ्नो नाममा स्थापित अंशिका शिक्षा कल्याण फाउन्डेसनबाट झापाका १४ बालबालिकालाई पढाउने भएकी छन् ।

उनले ‘मिस युनिभर्स नेपाल–२०२०’ हुँदा पाएको १० लाख रुपैंयाँ पुरस्कारलाई ट्रस्टका रुपमा स्थापना गरेर बालबालिकामाझ खर्च गर्ने जनाएकी छन् ।

उनले एक विज्ञप्ती जारी गर्दै फाउन्डेसनमार्फत झापाका १४ बालबालिकालाई विद्यालय शुल्क, पोशाक, पाठ्यक्रम सामग्री, पौष्टिक खाना, आवास, यात्रा, बालिकाको स्वास्थ्यसम्बन्धी औषधीजन्य सामग्रीलगायत सामग्री सेवा पुर्‍याउने खुलाएकी छन् ।

यसअघि अंशिका र उनका साथीहरू मिलेर जुम्लामा १० जना विद्यार्थीलाई छात्रवृत्ति प्रदान गरेका थिए ।

झापा घर भएकी अंशिकाले प्रारम्भिक अवस्थामा फाउण्डेसनको कार्यक्षेत्र झापालाई नै बनाउने भएकी छन् ।