काठमाडौँ- राजा श्रेणिक बुद्ध कहाँ पुग्दा बुद्धका वरिपरी भिक्षुहरु बसिरहेका देखे । उनीहरुको अनुहार आनन्दले मग्न थियो ।

उनको दृष्टि एकातिर बसेका राजकुमारतिर गयो, जो उदास अनुहार लिएर बसेका थिए ।

श्रेणिकको मन दुविधामा पर्‍यो । कति कठोर दिनचर्या थियो भिक्षुहरुको ? तर पनि उनीहरुको अनुहार आनन्दले दिप्त थियो । अर्कोतिर राजकुमार सबै सुविधा प्राप्त भएर पनि हैरान । यस्तो किन ?

राजाले भगवान् बुद्धसँग यसको उत्तर सोधे ।

बुद्धले भने— ‘राजन, मेरा भिक्षुहरुको स्वभाव नै अर्कै बनिसकेको छ । जस्तै समस्या आए पनि उनीहरुको मानसिक शान्ति भङ्ग हुने छैन । उनीहरु जुनसुकै अवस्थामा पनि खुशी रहन सक्छन् । भविष्यको चिन्ता नगर्नु यसको कारण हो । उनीहरू वर्तमानमा बाँच्छन् । आज जेजस्तो छ, त्यस्तै देख्छन् । उनीहरुको प्रसन्नताको राज यही हो ।’

साभार : ‘विश्वका उत्कृष्ट प्रेरक प्रसङ्गहरु’ पुस्तकबाट