काठमाडौँ– प्रधानमन्त्री तथा रक्षामन्त्री केपी शर्मा ओलीले नेपाली सेनाको पृतनापति समन्वयात्मक बैठकलाई सम्बोधन गरेका छन् । उनले जङ्गी अड्डामा भएको बैठकलाई सम्बोधन गरेका हुन् ।

महाशिवरात्रि तथा सेना दिवसको पूर्वसन्ध्यामा बैठक राखिएको हो । नेपाली सेनाले वार्षिक रुपमा दुईपटक पृतना बैठक राख्दै आएको छ ।

सैनिक जनसम्पर्क सूचना निर्देशनालयका अनुसार सो बैठकमा पृतनापतिबाट आफ्नो जिम्मेवारी क्षेत्रमा सुरक्षाको वर्तमान वस्तुस्थिति प्रतिवेदन पेश हुने छ ।

बैठकमा महानिर्देशनालय र विभागीय प्रमुखबाट आन्तरिक सुदृढीकरणको क्षेत्रमा भए र गरेका कार्यबारे प्रस्तुतीकरण एवं छलफल हुने जनाइएको छ ।

सेनाका सातै प्रदेशमा एक–एक र काठमाडौँ उपत्यकामा एक पृतना छ । सेनाको पृतनाको नेतृत्व उपरथीबाट हुँदै आएको छ ।