काठमाडौँ- नेकपाको दाहाल-नेपाल समूहको केन्द्रीय कमिटी बैठक आज बस्दैछ।

पार्टी कार्यालय पेरिसडाँडामा दिउँसो १ बजे डाकिएको बैठकमा केन्द्रीय सदस्यहरूलाई पार्टीको परिचय पत्र वा नागरिकता लिएर उपस्थित हुन सर्कुलर गरिएको छ ।

फागुन २३ गते प्रतिनिधिसभा बैठक बस्ने तय भएसँगै दाहाल-नेपाल समूहले कसरी प्रस्तुत हुने भन्ने रणनीति तय गर्न बैठक डाकिएको एक नेताले जानकारी दिए ।

यसअतिरिक्त पार्टीका बहुमत सदस्यहरूको हस्ताक्षरलाई अर्कै प्रयोजनको हस्ताक्षर दूरूपयोग गरेको भन्ने ओली पक्षीय आरोपलाई खण्डित गर्न नागरिकता नै पेस गरेर चुनौती दिने तयारी पनि यो समूहले गरेको छ ।

पार्टी विवादमा प्रधानमन्त्री केपी शर्मा ओलीले पुस ५ मा प्रतिनिधिसभा विघटन गरेपछि विभाजित बनेको नेकपा कानूनी रूपमा मात्रै एक छ ।

फागून ११ मा सर्वोच्च अदालले प्रतिनिधिसभा पुनर्स्थापना गरेपछि यो समूह बैधानिकरूपमा संसदीय दलको नेता परिवर्तन गर्दै ओलीलाई अविश्वासको प्रस्तावमार्फत हटाउने तयारीमा लागेको छ ।

तर, प्रतिपक्षी दलहरूले पार्टीको आधिकारिता नसुल्झिएसम्म साथ नदिने जनाएपछि दाहाल-नेपाल समूह अप्ठ्यारोमा परेको छ ।