काठमाडौँ– सुनको मूल्य ७ महिनापछि पहिलोपटक ९० हजारभन्दा तल झरेको छ। बुधबार सुन प्रतितोला ८९ हजार ८ सय रुपैयाँ कायम भएको हो।

नेपाल सुन चाँदी महासंघले कोरोना महामारीपछि गत जेठमा सुन बजारका लागि कायम गरेको मूल्य ८७ हजार ७ सय रुपैयाँ थियो। त्यसपछि लगातार बढ्न थालेको मूल्य असारमा प्रतितोला ८९ हजार ७ सय रुपैयाँ भयो। त्यसपछि भने सुनको भाउ लगातार उकालो लाग्दै तोलाको १ लाख रुपैयाँ माथि पुग्यो।

अन्तर्राष्ट्रिय बजारमा लगानीकर्ताहरु सुनप्रति आकर्षित हुन थालेपछि मूल्य उकालो लाग्दै प्रतितोला एक लाख ३ हजार ५ सय रुपैयाँसम्म पुगेको थियो।

हाल लगानीकर्ताहरु सेयरतर्फ आकर्षित हुदा सुनको मूल्य घट्न थालेको महासंघले जनाएको छ।

यतिबेला पुनः सुनको मूल्य घट्दै प्रतितोला ८९ हजार ८ सय रुपैयाँ भएको छ। केही समयदेखि सुनको मूल्य प्रतितोला ९० हजारभन्दा तल झरेको थिएन।

बुधबार अघिल्लो दिनको भन्दा तोलामा ११ सय रुपैयाँले गिरावट भएको हो। गत हप्तादेखि सामान्य गिरावट भइरहेको सुनको मूल्य मंगलबार तोलामा २ सय रुपैयाँले बढेको थियो।

चाँदीको मूल्यमा भने सामान्य गिरावट आएको छ। अघिल्लो दिनको भन्दा २० रुपैयाँले घटेर प्रतितोला १३ सय ४० रुपैयाँ भएको छ। मंगलबार तोलामा १५ रुपैयाँले बढेर प्रतितोला १३ सय ६० रुपैयाँमा कारोबार भएको थियो।

नेपाल सुनचाँदी व्यवसायी महासंघका महासचिव धर्मसुन्दर बज्राचार्यले एक महिनाभित्र सुनको मूल्य घटेर प्रतितोला ८० हजार रुपैयाँसम्म आइपुग्ने अनुमान गरे।

अन्तर्राष्ट्रिय बजारमा बुधबार सुन प्रतिऔंस १७९२.३२ डलर र चाँदी प्रतिऔंस २७.३३ डलरमा कारोबार भएको छ।