काठमाडौं– शिक्षक बन्ने सपना देखेका एक युवकको कथामा आधारित रहेर फिल्म ‘प्रकाश’ निर्माण हुने भएको छ ।

राजधानीमा एक कार्यक्रमको आयोजना गर्दै फिल्म निर्माणको औपचारिक घोषणा गरियो । बिनिस इन्टरटेनमेन्टको व्यानरमा दिनेश राउतले निर्देशन गर्ने फिल्ममा अभिनेता प्रदीप खड्काले शीर्ष भूमिका निभाउने निर्माण टिमले जानकारी दिएको छ ।

निर्देशक राउतले ग्रामीण एक युवाले शिक्षक बन्न गरेको संघर्षलाई फिल्ममा देखाइने बताए । ‘सरकारी विद्यालयको शिक्षक बन्न एक युवकले के के कुराको सामना गर्नुपर्छ भन्ने कुरा प्रकाशमा दर्शकले हेर्न पाउनेछन्’, पत्रकार सम्मेलनमा निर्देशक राउतले भने ।

प्रेमकथाका फिल्म बनाइरहेका दिनेशले यसअघि एक कमेडियनको संघर्षको कथा बोकेको फिल्म ‘सेल्फी किङ’ निर्देशन गरेका थिए ।

अभिनेता प्रदीपले फिल्मको कथाको माग अनुसार आफूले ज्यान घटाएको खुलाए । ‘फिल्मकै लागि मैले झन्डै सात किलो तौल घटाएको छु’, उनले भने ।

फिल्ममा प्रदीपसँगै दिया मास्के, प्रकाश घिमिरे, राजन खतिवडा, अम्जद परवेज, रामबाबु रेग्मी, देवकुमार श्रेष्ठ, निरज पन्थी, हुम बिसी, प्रशान्त श्रेष्ठ, गोविन्द सुनवार, पवित्रा खड्का, लोकेन्द्र लेखक र दीपेन्द्र शाहीको अभिनय रहनेछ । यसै फिल्ममार्फत रेनु योगीले नायिकाको रुपमा ‘डेब्यू’ गर्दैछिन् ।

महेन्द्र अधिकारीको लगानी रहने फिल्ममा राजेश श्रेष्ठको छायांकन, अनुप बरालको कास्टिङ निर्देशन र विकास सुवेदीको लेखन रहेको छ ।

फिल्ममा ताराप्रकाश लिम्बु, एलिस कार्की र दीपक शर्माको संगीत, जीवन थापाको सम्पादन रहनेछ ।