काठमाडौं– फेसन डिजाइनर निशा श्रेष्ठले चाबहिलस्थित गणेशस्थानमा निनिज बुटिक सञ्चालनमा ल्याएकी छन् । बुटिकको हालै ‘नेपाल स्टार’ तथा अभिनेत्री विष्णु चेम्जोङले शुभारम्भ गरिन् ।

बुटिककी निशाले फेसन डिजाइन प्रति पहिलेदेखि नै रुची भए पनि दक्ष भएर बुटिक सञ्चालन गर्ने चाहनाका कारण केही ढिलाई भएको बताइन् ।

बागबजारस्थित आईआईएफटी स्कूल अफ फेसनमा फेसन डिजाइनिङमा डिप्लोमा कोर्ष गरेका निशा उक्त फेसन कलेजबाट डिजाइनर कोर्ष गरी बुटिक सञ्चालन गर्ने पछिल्लो डिजाइनर हुन् ।

फेसन डिजाइनर निशाले बुटिकको नाम नेवारी भाषामा राखेकी छन् । ‘नेवारी भाषामा निनिजको अर्थ फुपु हुन्छ’ उनले भनिन्, ‘नेवारी नाम भएपनि यो म, मेरो श्रीमान र छोरीको नामबाट मिलाएर निनिज राखेकी हुँ ।’ उनले समय सापेक्षित ग्राहकको मागअनुसार पहिरन तयार गर्ने बताइन् ।

अभिनेत्री विष्णुले आफू फेसन कन्सस नभएपनि राम्रो लगाउन भने मनपर्ने बताइन् ।