भक्तपुर- खानेपानी मन्त्री बिना मगरले  भक्तपुरको क्यान्सर अस्पतालमा ‘फलोअप चेकअप’का गराएकी छिन् । उन स्वास्थ्य अवस्था सामान्य रहेको  अस्पतालले जनाएको छ ।

गएको माघ १३ गते क्यान्सरसम्बन्धी सम्पूर्ण जाँच गराएकी  मन्त्री मगरको  ‘फलोअप चेकअप’ परीक्षणबाट क्यान्सर सम्बन्धी कुनै लक्षण नदेखिएको प्रष्ट भएको हो ।

दुई महिनाअघि गराइएको जाँचको रिपोर्टसहित बिहीबार पुनः फलो अपको लागि क्यान्सर अस्पताल भक्तपुर पुगेकी उनी स्वस्थ रहेको अस्पतालका मेडिकल डाइरेक्टर प्रो.डा. ऋषिकेशनारायण श्रेष्ठले जानकारी दिए ।

‘उहाँ (मन्त्री  मगर) फलो अपको लागि बिहीबार अस्पताल पुग्नुभएको हो’, उनले भने, ‘उहाँको सम्पूर्ण रिपोर्ट नर्मल छ । क्यान्सरसम्बन्धी कुनै लक्षण देखिएको छैन ।’

दुई महिनाअघि नियमित स्वास्थ्य जाँच गरेकी अस्पतालकी स्त्रीरोग विशेषज्ञ डा. सृष्टि श्रेष्ठ प्रजापतिले नै बिहीबार पनि मन्त्री मगरको स्वास्थ्य जाँच गरेकी थिइन् ।  नियमित स्वास्थ्य जाँचको लागि रगत लिइएको थियो । त्यस्तै अल्ट्रासाउन्डसमेत गरिएको थियो ।

‘खानेपानी मन्त्रीज्यू सम्पूर्ण रिपोर्ट राम्रो छ’, स्त्रीरोग विशेषज्ञ डा. प्रजापतिले भनिन्, ‘उहाँले जस्तै सबैले बेलो बेलामा आफ्नो नियमित स्वास्थ्य जाँच गराउनुपर्छ । जसले रोग हुन लागे नलागेको शुरुमै थाहा हुन्छ र उपचारबाटै निको पार्न सकिन्छ ।’