मुम्बई–गत वर्षको कोरोना महामारीका कारण आम मानिसको जिन्दगीमा निकै बद्लाव आएको छ ।

यो महामारीका कारण विश्वका करोडौं मानिस बेरोजगार बनेका छन् । मनोरञ्जन उद्योगको अवस्थामा पनि राम्रो हुन सकेको छैन ।

धेरै फिल्मको सुटिङ रोकिएकाले बलिउडमा धेरैजसो बेरोजगार बनेका छन् । बलिउड अभिनेता शाहरुख खानको ‘डुप्लिकेट’ भनेर चिनिने राजु राहिकवारको अवस्था पनि उस्तै छ ।

राजु विश्वभरमा हुने विभिन्न कार्यक्रममा उपस्थित जनाएर शाहरुखको मिमिक्री गर्दै आम्दानी गर्दै आएका थिए । तर कोरोना भाइरसका कारण लागु भएको लकडाउन र कार्यक्रम हुने हल बन्द भएपछि उनको अवस्था नाजुक बनेको छ ।

बेरोजगार भएपछि उनले अभिनेता सोनू सूदलाई ट्वीटरमार्फत आफूलाई सहयोग गर्न आव्हान नै गर्नुपर्यो ।

हालका दिनमा राजु गुगलमा इभेन्ट मेनेजरको नम्बर खोजेर मेनेजरलाई आफूलाई काम दिनका लागि सन्देश पठाउन थालेका छन् ।

‘ममाथि धेरै पारिवारिक जिम्मेवारी छ र यसका लागि मलाई कामको आवश्यकता छ’, उनी भन्छन् ।

राजु आफूसँग बिजुलीको बिल तिर्ने पैसासमेत नरहेको खुलाउछन् । ‘पैसा नभएका कारण घरको बिजुली काटीदिने चेतावनी पनि आएको थियो । मलाई अहिले पैसा होइन, काम चाहिएको छ’, उनी भन्छन् ।
–एजेन्सी