बुटवल— नेकपा ओली समूहका महासचिव एवं अर्थमन्त्री विष्णु पौडेलले नेकपा पार्टी नफुटेको तर केही स्वार्थी व्यक्तिहरुले किनारा लागेको बताएका छन ।

बुटवलमा ओली पक्षले शनिबार गरेको जनसभालाई सम्बोधन गर्दै पौडेलले नेपाली जनता नेकपाको पक्षमा रहेको र उनीहरुले पार्टी फुट्न नदिने दाबी गरे ।

‘नेकपा पार्टी फुटेको छैन । केही स्वार्थी, लोभी र विभाजनकारी तत्व मात्रै किनारा हुन्,’ उनले भने ,‘नेपाली जनताले नेकपालाई फुट्न दिदैनन् ।’

पार्टी भित्रबाटै सरकार ढाल्ने र ओलीलाई अध्यक्षबाट समेत हटाउने प्रपञ्च रच्न थालेपछि यो अवस्था आएको नेता पौडेलले बताए । महासचिव पौडेलले निर्वाचन आयोगले पार्टी फुटेको भन्न नमिल्ने अभिव्यक्ति दिएकाले पनि पार्टी नफुट्ने र मिलेर चुनावमा जाने दाबी गरे ।

महासचिव पौडेलले जनता केपी ओलीको पक्षमा रहेको र अबपनि केपी ओलीकै नेतृत्वमा चुनाव हुने र सरकार बन्ने दाबी गरे ।