काठमाडौँ– बृहत् नागरिक आन्दोलनले शुक्रबार काठमाडौँमा मार्चपास गरेको छ ।

प्रतिनिधिसभा विघटन तथा संवैधानिक निकायमा गरिएका नियुक्तिको विरोधमा नागरिक आन्दोलनले काठमाडौँको लैनचौरबाट शीतलनिवासम्म मार्चपास गरेको हो ।

लैनचोरबाट सुरू भएको मार्चपास पानीपोखरी पुगेर कोणसभामा परिणत भयो । मार्चपासमा सहभागीलाई पानीपोखरीबाट प्रहरीले अघि बढ्न नदिएपछि त्यहीँ कोणसभा गरिएको थियो ।

मार्चपास गर्दै नागरिक समाजका अगुवाले राष्ट्रपति ज्यू संविधान कहाँ छ ?, अवैधानिक नियुक्ति मान्दैनौं, सत्ता कब्दा मुर्दावाद, लोकतन्त्र जिन्दावादलगायतका प्लेकार्ड प्रदर्शन गरेका थिए ।

सभामा बोल्ने वक्ताहरुले प्रधानमन्त्रीको कदम र राष्ट्रपतिको भूमिकाको आलोचना गरेका थिए । कोणसभामा नागरिक अगुवाले संविधान मिच्ने काम प्रधानमन्त्रीबाट भएको भन्दै यसलाई नसच्चाएसम्म विरोध गर्नुपर्ने बताएका छन् ।

बृहत् नागरिक आन्दोलन संसद बिघटन विरुद्ध निरन्तर आन्दोलन गर्दै आएको छ ।