काठमाडौं – चलचित्र ‘होस्टेल’ बाट अनमोल केसी नयाँ सम्भावनासहित फिल्म क्षेत्रमा उदाए । यही फिल्मले उनलाई फिल्मका दर्शकमाझ चिनारी दियो । नेपाली फिल्म नै नहेर्ने दर्शकलाई पनि फिल्मप्रति रुचि देखाउन केही हदसम्म सफल रहे अनमोल । त्यसपछि अनमोल र हेमराजले फिल्म ‘जेरी’ र ‘गाजलु’ मा एकसाथ काम गरे । दुवै फिल्मले व्यापारिक रुपमा सफलता हासिल गरे । प्रतिक्रिया राम्रै बटुले ।

यता अनमोलविना हेमराजले निर्देशन गरेका फिल्मले भने खासै व्यापारिक सफलता हासिल गर्न सकेनन् । अनमोलले अभिनय गरेको फिल्म ‘कृ’ लाई पनि दर्शकले खासै रुचाएनन् । यद्यपि निर्माण टिमले भने फिल्मले अनमोलकै कारण लगानी उठाएको दावी गर्दै आएको छ ।

यतिबेला भने फिल्म क्षेत्रमा अनमोल र हेमराज दुवैका लागि फागुन १७ गते परीक्षाको घडी बनेको चर्चा चल्न थालेको छ । सोही मितिमा दुई फिल्म ‘क्याप्टेन’ र ‘ब्रेकअप’ एकसाथ रिलिज हुँदैछन् । ‘क्याप्टेन’ मा अनमोल छन्, जसलाई दिवाकर भट्टराईले निर्देशन गरेका छन् । अर्कातिर हेमराज बिसी निर्देशित फिल्म ‘ब्रेकअप’ पनि सोही मितिमा रिलिज हुँदैछ, जसमा आशिरमान देशराज जोशी र शिल्पा मास्केको जोडी देख्न सकिनेछ ।

हेमराज बिसीको निर्देशकीय क्षमताको फिल्मकर्मीले तारिफ गर्ने गर्छन् । तर अनमोललाई नलिई बनाइएका फिल्म आशा गरिएअनुसार नचल्दा कतिपयले हेमराजलाई फिल्म चलाउन अनमोल नै चाहिने हो? समेत भनेर प्रश्न गर्ने गरेका छन् ।

प्रश्नको उत्तर भने दर्शकले फागुन १७ मै दिनेछन् । त्यसो त यी दुई फिल्म जानराका हिसाबले पूरै फरक छन् । अनमोल केसीको फिल्म ‘क्याप्टेन’ स्पोर्टस् जानरामा निर्माण भएको हो भने ‘ब्रेकअप’ ले एउटा सामान्य प्रेमकथा बोकेको छ । यता दर्शकलाई दुवै फिल्मको प्रतीक्षा छ ।