दोहा– बेलायतमा देखिएको नयाँ प्रजातिको कोरोना ओमानमा पनि देखिएको छ ।

नयाँ स्वरुपको कोरोना भाइरसको संक्रमण पुष्टि भएसँगै ओमान सरकारले सामूहिकरुपमा भेला हुन प्रतिबन्ध लगाएको छ ।

त्यहाँ कोरोनाको अनुगमन मुल्याङ्कन गरिरहेको ओमानको सर्वोच्च कमिटीको पछिल्लो निर्णयानुसार ओमानमा संक्रमणबाट जोगिन थप सतर्कता अपनाउने सम्बन्धी केही निर्देशनहरू जारी गरेको नेपाली दूतावासले जनाएको छ ।

जसअन्तर्गत सामुहिकरूपमा भेला हुने तथा सामाजिक कार्यहरूमा जमघट हुने कार्यमा पूर्णरूपमा प्रतिबन्ध लगाइएको छ।

दूतावास एक सूचना जारी गर्दै ओमानमा रहेका नेपालीहरुलाई स्वास्थ्य मापदण्डका निर्देशन पालना गर्न अनुरोध गरेको छ ।

यस विषयमा थप बुझ्नु परेमा दूतावासको सम्पर्क नम्बर २४६९६१७७ २४६९६८८३ र हटलाइन नम्बर ७१५९२४९० मा सम्पर्क गर्न सकिने दूतावासले जनाएको छ ।

यो समाचार तयार पार्दासम्म ओमानमा कोरोना सङ्क्रमित हुनेको सङ्ख्या १ लाख ३३ हजार ७२८ पुगेको छ । उपचारपछि निको हुनेको सङ्ख्या १ लाख २६ हजार ५७२ पुगेको छ भने मृत्यु हुनेको सङ्ख्या १ हजार ५२७ रहेको छ ।

ओमानमा कोरोना खोप (भ्याक्सिन) लगाउने कार्य जारी रहेको छ ।