नेपालगञ्ज– आठौं राष्ट्रिय खेलकुद अन्तर्गत पौडीको स्पर्धामा गौरीका सिंहले मंगलबार भएको खेलमा ३ स्वर्ण जित्दै व्यक्तिगत ८ स्वर्ण जितेकी छिन् । प्रतिस्पर्धामा गौरीकाले एउटा राष्ट्रिय कीर्तिमान सहित तीन स्वर्ण जितेकी हुन् ।

नेपालगञ्जमा भएको प्रतिस्पर्धामा गौरीकाले महिला एक सय मिटर बटरफ्लाइमा एक मिनेट सात दशमलव नौ सात सेकेण्डको समय निकाल्दै स्वर्ण जितिन् ।

उनले आफ्नै नाममा रहेको एक मिनेट आठ दशमलव ६ तीन सेकेण्डको समय सुधार गरेकी हुन् । यस्तै उनले २०० मिटर फ्रिस्टाइलमा पनि स्वर्ण जितिन् । उनले निर्धारित दूरी दुई मिनेट नौ दशमलव १९ सेकेण्डमा पूरा गरिन्।

महिला दुई सय मिटर ब्याकस्ट्रकमा पनि गौरिकाले नै स्वर्ण चुमिन् । उनले दुई मिनेट ४१ दशमलव २५ सेकेण्डको समयमा निर्धारित दूर पूरा गर्दै अन्य प्रतिस्पर्धीलाई उछिनेकी थिइन् ।

यस्तै महिला चार गुणा एक सय मिटर रिलेमा गौरीका सम्मिलित आर्मीको टिमले स्वर्ण जित्यो । पुलिसको टिमलाई पछि पारेको आर्मीले चार मिनेट ५१ दशमलव ८९ सेकेण्डमा दुरी पुरा गर्‍यो ।