काठमाडौँ– संसद विघटनविरुद्धको मुद्दा सुनुवाइ संवैधानिक इजलासमा जारी रहँदा न्यायाधीशहरुले दलहरुले गरिरहेका गतिविधिबाट अदालत प्रभावित हुन नदिने बताएका छन् ।

बुधबारको सुनुवाइमा रिट निवेदकले उठाएको प्रश्नमा न्यायाधीश अनिलकुमार सिन्हाले संसद विघटनका विषयमा बाहिरको कुराले आफूहरु प्रभावित नहुने बताएका हुन् ।

बहसका क्रममा अधिवक्ता कञ्चनकृष्ण न्यौपानेले प्रधानमन्त्रीको अभिव्यक्ति शक्तिपृथकीकरणको सिद्धान्तविपरीत भन्दै त्यसले अदालतको कार्यक्षेत्रलाई हस्तक्षेप गरिरहेको बताएका थिए ।

‘कार्यपालिका प्रमुखले शक्तीपृथकीकरणको सिद्धान्त विपरीत बोल्न हुदैन । उहाँले अदालतको कार्यक्षेत्रमा हस्तक्षेप गरिरहनुभएको छ’ न्यौपानेले बताए ।

उनलाई रोक्दै न्यायाधीश सिन्हाले भने, ‘बाहिरको कुराले तपाइँ प्रभावित हुनुहुन्छ ? हुनुहुन्न भने हामी पनि हुन्नौं ।’

*यसअघि भूलवश प्रधानन्यायाधीश उल्लेख भएकाले सच्याइएको छ।