काठमाडौं – वरिष्ठ संगीत साधक तथा रचनाकार मदन दिपबिमको हृदयाघातका कारण निधन भएको छ । इलाममा जन्मिएका दिपबिम हाल अमेरिकाको क्यालिफोर्नियामा बसोबास गर्दै आएका थिए ।

उनको सोमवार अमेरिकामै निधन भएको पारिवारिक स्रोतले बतायो ।

दिपबिमले के भुल भयो प्रिया, झस्केर दुख्छ यो मुटु मेरो, सुरिलो रुख सल्लै हो लगायतका चर्चित गीतमा संगीत दिएका थिए ।

दिपबिमले चर्चित गीत भन्छन् कोही जिन्दगी यो कर्कलाको पानी  रचना गरेका थिए । दिपबिम नेपाल हुँदा केही समय रेडियो नेपालका जागीरे समेत थिए ।

ममता दिपबिमसँगै अमेरिकामा बस्दै आएका दिपबिम एक महिनादेखि बिरामी रहेको परिवारले बतायो । दिपबिमको अन्तेष्टि अमेरिकामै गर्ने र काजकिरिया नेपालमा गर्ने पारिवारिक स्रोतले जनायो ।

निधनको समाचारसँगै नेपाली संगीतकार तथा गायकले दिपबिमप्रति श्रद्धाञ्जली व्यक्त गरेका छन् ।