काठमाडौँ– प्रधानमन्त्री एवं नेकपा अध्यक्ष केपी शर्मा ओलीले केटाकेटीलाई मन्त्री बनाउँदा ‘लात्ताले हानेर’ भागेको भन्दै पूर्व मन्त्री योगेश भट्टराईप्रति कटाक्ष गरेका छन् ।

नेकपा स्थायी कमिटी सदस्य तथा पूर्व पर्यटनमन्त्री भट्टराईप्रति लक्षित गर्दै प्रधानमन्त्री ओलीले मन्त्री बनाएपछि ‘लात्ताले हानेर’ भागेको कटाक्ष गरेका हुन।
प्रदेश नम्बर १ को सम्पर्क कमिटीको भेलामा उनले भने, ‘बैगुनी केटाकेटीको बारेमा कुरा गर्न चाहान्न । हाम्रै प्रदेशमा पनि त्यस्तो देखिएको छ । दौडी दौडी गएर भोट मागियो, यो केटालाई जिताएर पठाउनुस् मन्त्री बनाएर पठाइदिन्छु भनियो, मन्त्री पनि बनाइयो । पुक्क लात्ताले हानेर भाग्यो, को भनेर हेरेको त उही केटो रैछ ।’

ओलीले आफू त्यस्ता कुरामा नअल्झिने बताउँदै पार्टीमा युवाहरुको कमी नभएको बताए ।

पुस ५ गते प्रधानमन्त्रीले प्रतिनिधिसभा विघटन गरेपछि भट्टराई लगायत दाहाल–नेपाल समूहका ७ मन्त्रीले सामुहिक राजीनामा दिएका थिए ।