काठमाडौँ- राष्ट्रिय महिला लिग माघ ७ गतेदेखि सुरू हुने भएको छ। शुक्रबार अखिल नेपाल फुटबल संघ (एन्फा) ले लिग सुरू हुने जानकारी दिएको हो।

७ टिमले प्रतिस्पर्धा गर्ने महिला लिगको उद्घाटन र समापन खेल दशरथ रंगशालामा हुनेछ भने लिगका अरु खेल भने एन्फा मैदान सातदोबाटोमा हुनेछन्।

चन्द्रागिरि नगरपालिका, त्रिभुवन आर्मी क्लब, एपीएफ क्लब, विराटनगर महानगरपालिका, वालिन नगरपालिका, चन्द्रपुल नगरपालिका र नेपाल पुलिस क्लबले लिग खेल्नेछन् ।

लिगको विजेताले १५ लाख पाउनेछ भने दोस्रो हुने टिमले ८ लाख, तेस्रो हुनेले ५ लाख र चौथो हुने टिमले ३ लाख पाउनेछ।

लिग खेल्ने हरेक टिमले २३ खेलाडी र ७ अफिसियल गरि ३० जनाको टिम हुनेछ। हरेक टिममा ४ जना विदेशी खेलाडी हुनेछन्।

लिगको उत्कृष्ट खेलाडीले स्कुटर पाउनेछन् भने उत्कृष्ट स्टाइकर, मिडफिल्डर, डिफेज्डर, गोलकिपर र प्रशिक्षकले ५० हजार पुरस्कार पाउनेछन्। यस्तै फेयरप्ले टिमले १ लाख ५० हजार पाउनेछ।

लिगमा सहभागी सातवटै टिमले तयारीका लागि १/१ लाख पाउनेछन् भने कोभिड रिलिफ फन्डबाट ५० हजार पाउनेछन्।

लिगका दौरान कुनै खेलाडी वा अफिसियललाई कोरोना भाइरस देखिए आइसोलेसनको व्यवस्थापन एन्फाले गर्ने बताइएको छ।